A gran partida do comercio local

Benvido a BOIRO XOGA, o novo xogo de mesa creado pola Asociación Boirense de Empresas.

Inspirado nas rúas, nos negocios e na identidade da nosa vila, o xogo é o punto de partida dunha gran campaña de dinamización comercial que se desenvolverá do 5 ao 19 de setembro.

Durante estas dúas semanas, as compras nos negocios asociados permitirán conseguir o xogo exclusivo de Boiro, obter agasallos, participar en sorteos e descubrir diferentes retos e propostas pensadas para todos os públicos.

Como conseguir o teu BOIRO XOGA?

Conseguir o teu xogo é moi sinxelo. Só tes que realizar compras nos establecementos asociados á ABE durante a campaña e rexistrar os teus tíckets de compra na nosa plataforma.

Cada compra achegarate ao obxectivo de conseguir un xogo inspirado no comercio, nos espazos e na identidade de Boiro.

Sigue estes pasos:

Merca en calquera negocio asociado á ABE entre o 5 e o 19 de setembro.

Garda o teu tícket de compra.

Rexistra o tícket na plataforma online.

Acumula puntos ata obter os 300 que precisas para cambialos polo xogo. (Oferta exclusiva para a campaña, ao finalizar o xogo pasará a costar 500 puntos)

Descobre as frases da campaña e gaña o teu BOIRO XOGA

As rúas de Boiro tamén forman parte da partida. Durante a campaña atoparás 8 frases inspiradas nos xogos de mesa, adaptadas ao comercio local, en pancartas, monólitos e lonas de gran formato distribuídos por distintos puntos do municipio.

Agora tócache a ti demostrar canto prestaches atención.

Preme no banner e xoga online a descubrir as frases da campaña. Canto mellor sexa a túa puntuación, máis preto estarás de gañar.

As 3 persoas que consigan a mellor puntuación levarán de agasallo un exemplar exclusivo de BOIRO XOGA.

Atréveste a completar a partida?

A gran festa final e o Panel de Premios

O 19 de setembro BOIRO XOGA remata cunha gran festa para toda a familia, con actividades, degustacións e o espectacular Panel de Premios.

Durante toda a campaña, os comercios participantes repartirán vales BOIRO XOGA, entregando 1 vale por cada compra igual ou superior a 20 €. Ademais, o día da festa habilitarase un punto de intercambio, onde tamén poderás converter os teus tíckets de compra en vales adicionais.

Cada vale poderá utilizarse para participar nunha das actividades da festa: acceder aos inchables, gozar das degustacións gastronómicas ou probar sorte no Panel de Premios.

Para participar no panel só terás que entregar un vale e lanzar dous dados xigantes. A suma obtida (do 2 ao 12) indicarache a casiña do panel onde descubrirás o teu premio. Cada persoa poderá realizar un máximo de dúas tiradas.

Ao longo da xornada repartiranse 2.000 € en Bonos ABE, en premios de 5 € e 10 €, ademais de 100 exemplares do exclusivo BOIRO XOGA. Se ao rematar a festa quedasen Bonos ABE sen entregar, o importe restante sortearase entre todas as persoas participantes nun gran bote final.