BASES I CONCURSO DE DEBUXO SOMOS BOIRO
Primeiro concurso de carteis escolares organizado polo Concello de Boiro, a Asociación Boirense de Empresarios e os Equipos de Dinamización da Lingua Galega dos centros de ensino de Boiro.
Os oito carteis gañadores protagonizarán a campaña de potenciación do consumo local da ABE na primavera 2024.
Obxectivo: Sensibilizar o alumnado da importancia do sentimento local, do que implica a posta en valor da nosa contorna.
Temática: A temática terá que ver fomento do consumo local e a posta en valor da nosa contorna, patrimonio, lingua… que achega á nosa comunidade*.
Primeiro.- Convocatoria e Categorías
Poderá participar o alumnado dos CEIP e IES do Concello de Boiro a partir dos 3 anos.
Establécense 4 categorías:
- Categoría A: entre os 3 e os 6 anos.
- Categoría B: entre os 7 e os 9 anos.
- Categoría C: entre os 10 e os 14 anos.
- Categoría D: máis de 15 anos.
Segundo.- Traballos, lugar e prazo de presentación
A temática do cartel estará relacionada coa promoción do consumo local* e o uso da lingua galega.
Cada alumno/a poderá participar so cun cartel que terá que levar un lema en galego.
A técnica será libre.
Para a elaboración dos traballos facilitarase unha cartolina que a persoa participante deberá entregar cubrindo no reverso os seguintes datos: nome do centro, nome e apelidos do/a alumno/a, curso, idade e teléfono de contacto do pai/nai/titor/a.
Non se permitirá a participación con carteis elaborados noutros soportes.
O prazo de presentación de traballos iniciarase o luns 11 de marzo e finalizará o luns 1 de abril de 2024.
Lugar de presentación dos carteis: Deberán entregarse, no propio centro educativo aos responsables de EDLG, na Casa da Cultura R.M.L. e nas oficinas da ABE
Terceiro.- Xurado, premios e gañadores/as
O xurado estará composto por un profesor/a de cada centro participante, un técnico do departamento de Educación/Cultura do Concello de Boiro, a concelleira de Educación e/ou Cultura do Concello de Boiro e un/ha representante da ABE.
Elixiranse 8 traballos que terán como premio ser os protagonistas da campaña de promoción do consumo local da ABE na primavera 2024, aparecendo os carteis, o nome dos/as autores/as e os centros de procedencia nas 45 pancartas que se colocaran nos farois da rúa peonil e 2 lonas de 20 metros cadrados colocadas na fachada da Casa Consistorial.
Ademais, cada autor/a recibirá un BONO ABE por valor de 30 euros para empregar, sen caducidade, en calquera dos máis de 200 negocios asociados da ABE. Os premios só serán válidos en vales de compra, non se poderán trocar por diñeiro en efectivo.
O xurado, unha vez seleccionados os traballos premiados, dará a coñecer os resultados do concurso a través da páxina web da ABE, do Concello de Boiro e a través da comunicación aos centros.
Cuarto.- Entrega de premios
Os/as gañadores/as serán citados/as para a entrega de premios a través do teléfono de contacto indicado no reverso do cartel.
Quinto.- Aceptación das bases
A participación no concurso implica a aceptación, sen reserva, das presentes bases. Así mesmo, os/as gañadores/as, aceptan a publicación e difusión da obra, a súa imaxe, o nome e idade, curso e nome do centro educativo, nas distintas canles de comunicación tanto dixitais como analóxicas do Concello de Boiro e a ABE relativas ás campañas para fomentar o consumo local e o uso da lingua galega.
*achéganse ideas, non excluíntes, sobre a temática do concurso:
Somos Boiro...
- Porque todos xuntos e xuntas medramos
- Porque o noso comercio e a nosa lingua son nosas
- Porque as nosas rúas teñen vida
Exemplos da campaña anterior da ABE:
- Porque son profesionais e ofrecen asesoramento especializado
- Porque cos negocios abertos Boiro é seguro, luminoso e ten máis vida
- Porque os produtos son frescos e de tempada
- Porque xeran emprego e nos dan a posibilidade de que poidamos vivir e traballar no pobo.
- Porque mercando en Boiro contribúes á prosperidade económica dos teus veciños/as.
- Porque aforras tempo e podes dedicarllo aos que máis queres.
- Porque contamos con artigos especializados que aportan exclusividade.
- A organización reservase o dereito de modificar as presentes bases, sen incorrer en ningunha responsabilidade, previa comunicación na web e redes sociais da ABE.