DANIEL GARCÍA REELIXIDO PRESIDENTE DA ABE
PARA UN NOVO MANDATO
Daniel García foi nomeado presidente para os próximos 2 anos.
Na mesma asemblea tamén se presentaron as contas e memoria de actividade de 2024.
As empresas asistentes foron as primeiras en ver a nova rotulación da asociación tralo cambio de denominación.
Boiro 14 de marzo de 2025
A Asemblea Xeral da Asociación Boirense de Empresas (ABE), celebrada este venres no salón de actos da entidade, ratificou a reelección de Daniel García como presidente para os próximos dous anos. Trátase do seu cuarto mandato consecutivo desde que asumiu o cargo en 2019.
Na súa intervención, Daniel García expresou o seu "enorme agradecemento ás empresas asociadas pola confianza depositada" e recoñeceu "o valioso apoio dos traballadores e do equipo directivo, que conta con representantes de todos os sectores". Ademais, destacou a importancia do recente cambio de denominación da entidade, que pasa a chamarse Asociación Boirense de Empresas, cun nome máis inclusivo. Os asistentes á asemblea foron os primeiros en ver a nova rotulación interior e exterior das oficinas da asociación, que reflicte esta renovada identidade.
Continuidade e novos retos
Daniel García liderará o novo mandato cun equipo directivo que mantén a súa composición:
- Presidente: Daniel García Dosil
- Vicepresidente: Francisco Javier Caamaño Bouzas
- Secretario: Santiago Cajaraville Cardama
- Tesoureiro: Jesús Manuel Santamaría Somoza
- Vocais: Cristian Lago, Luis Miranda Sueiro, Óscar España Fernández e Fátima Treus Rey.
-
Entre os obxectivos prioritarios para este novo ciclo, Daniel García subliñou a importancia de seguir impulsando o crecemento da entidade, tanto en número de empresas asociadas como na oferta de actividades e servizos, consolidando a ABE como un referente empresarial a nivel nacional.
Ademais do nomeamento do presidente, a asemblea aprobou as contas do exercicio 2024 e acordou unha actualización das cotas de socio para garantir a capacidade adquisitiva da entidade ante o incremento dos prezos.
Unha asemblea innovadora cun ambiente distendido
Por primeira vez, a Asemblea Xeral celebrouse en formato sesión vermú, promovendo un espazo de intercambio máis próximo e distendido entre as empresas asistentes e a directiva. O evento concluíu cun aperitivo no que os participantes puideron compartir impresións e fortalecer lazos de colaboración.
Como detalle especial, os asistentes recibiron un exemplar da memoria de actividade de 2024, editada este ano en formato revista, que estará dispoñible para consulta e descarga na páxina web da asociación.
Con esta asemblea, a ABE reafirma o seu compromiso co tecido empresarial da comarca, apostando pola modernización, a inclusividade e o fortalecemento da comunidade empresarial local.